ਤਾਜਾ ਖਬਰਾਂ
ਆਈਪੀਐਲ 2026 ਦੇ ਇੱਕ ਰੋਮਾਂਚਕ ਮੁਕਾਬਲੇ ਵਿੱਚ ਪੰਜਾਬ ਕਿੰਗਜ਼ ਨੇ ਟੀ-20 ਕ੍ਰਿਕਟ ਦੇ ਇਤਿਹਾਸ ਵਿੱਚ ਸਭ ਤੋਂ ਵੱਡੇ ਸਫਲ ਰਨ-ਚੇਜ਼ਾਂ ਵਿੱਚੋਂ ਇੱਕ ਦਰਜ ਕਰਦਿਆਂ ਦਿੱਲੀ ਕੈਪੀਟਲਜ਼ ਨੂੰ 6 ਵਿਕਟਾਂ ਨਾਲ ਹਰਾ ਦਿੱਤਾ। ਅਰੁਣ ਜੇਤਲੀ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਵਿੱਚ ਦਿੱਲੀ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 264/2 ਦਾ ਵੱਡਾ ਸਕੋਰ ਖੜ੍ਹਾ ਕੀਤਾ, ਜਿਸ ਵਿੱਚ KL Rahul ਨੇ ਸ਼ਾਨਦਾਰ ਅਜੇਤੂ 152 ਦੌੜਾਂ ਬਣਾਈਆਂ।
ਇਸ ਵੱਡੇ ਟੀਚੇ ਦਾ ਪਿੱਛਾ ਕਰਦਿਆਂ ਪੰਜਾਬ ਨੇ ਸ਼ੁਰੂ ਤੋਂ ਹੀ ਆਕਰਮਕ ਰਵੱਈਆ ਅਪਣਾਇਆ। ਸਲਾਮੀ ਜੋੜੀ Prabhsimran Singh (76 ਦੌੜਾਂ, 26 ਗੇਂਦਾਂ) ਅਤੇ Priyansh Arya (43 ਦੌੜਾਂ, 17 ਗੇਂਦਾਂ) ਨੇ ਪਹਿਲੇ ਵਿਕਟ ਲਈ 126 ਦੌੜਾਂ ਦੀ ਧਮਾਕੇਦਾਰ ਸਾਂਝੇਦਾਰੀ ਕਰਕੇ ਟੀਮ ਨੂੰ ਮਜ਼ਬੂਤ ਸ਼ੁਰੂਆਤ ਦਿੱਤੀ।
ਬਾਅਦ ਵਿੱਚ ਕਪਤਾਨ Shreyas Iyer ਨੇ 36 ਗੇਂਦਾਂ ‘ਤੇ ਅਜੇਤੂ 71 ਦੌੜਾਂ ਬਣਾਕੇ ਟੀਮ ਨੂੰ ਸਿਰਫ਼ 7 ਗੇਂਦਾਂ ਬਾਕੀ ਰਹਿੰਦਿਆਂ ਜਿੱਤ ਤੱਕ ਪਹੁੰਚਾਇਆ। ਇਸ ਜਿੱਤ ਨਾਲ ਪੰਜਾਬ ਨੇ ਆਪਣੇ ਹੀ ਪਿਛਲੇ 262 ਦੌੜਾਂ ਦੇ ਚੇਜ਼ ਦੇ ਰਿਕਾਰਡ ਨੂੰ ਪਿੱਛੇ ਛੱਡ ਦਿੱਤਾ।
ਮੈਚ ਦੌਰਾਨ ਇੱਕ ਦੁਖਦਾਈ ਘਟਨਾ ਵੀ ਵਾਪਰੀ ਜਦੋਂ ਦਿੱਲੀ ਦੇ ਤੇਜ਼ ਗੇਂਦਬਾਜ਼ Lungi Ngidi ਕੈਚ ਲੈਣ ਦੀ ਕੋਸ਼ਿਸ਼ ਕਰਦਿਆਂ ਜ਼ਖਮੀ ਹੋ ਗਏ। ਉਹ ਪਿੱਛੇ ਡਿੱਗ ਪਏ ਅਤੇ ਸਿਰ ਜ਼ਮੀਨ ਨਾਲ ਟਕਰਾਉਣ ਕਾਰਨ ਮੈਚ ਕੁਝ ਸਮੇਂ ਲਈ ਰੋਕਣਾ ਪਿਆ। ਬਾਅਦ ਵਿੱਚ ਉਨ੍ਹਾਂ ਨੂੰ ਐਂਬੂਲੈਂਸ ਰਾਹੀਂ ਮੈਦਾਨ ਤੋਂ ਬਾਹਰ ਲਿਜਾਇਆ ਗਿਆ ਅਤੇ ਉਨ੍ਹਾਂ ਦੀ ਜਗ੍ਹਾ ਕੰਕਸ਼ਨ ਸਬਸਟਿਊਟ ਲਿਆਂਦਾ ਗਿਆ।
ਇਸ ਜਿੱਤ ਨਾਲ ਪੰਜਾਬ ਕਿੰਗਜ਼ 7 ਮੈਚਾਂ ਵਿੱਚ 13 ਅੰਕਾਂ ਨਾਲ ਅੰਕ-ਤਾਲਿਕਾ ਵਿੱਚ ਸਿਖਰ ‘ਤੇ ਕਾਇਮ ਹੈ, ਜਦਕਿ ਦਿੱਲੀ ਕੈਪੀਟਲਜ਼ 6 ਅੰਕਾਂ ਨਾਲ ਛੇਵੇਂ ਸਥਾਨ ‘ਤੇ ਹੈ।
Get all latest content delivered to your email a few times a month.
